കുറ്റിപ്പുറത്തെ കാമുകന്മാര്‍

കുറ്റിപ്പുറം....
മലപ്പുറം ജില്ലയിലെ പ്രശസ്തമായ ഒരു പട്ടണം.
ഒരു കാലത്ത് സംസ്ഥാനത്തിലെ തന്നെ ഗ്ലാമര്‍ നിയമസഭാ മണ്ഡലം ആയിരുന്ന സ്ഥലം.
ഭാരതപുഴയുടെ തീരം.
പലരെയും  ജീവിതാന്ത്യത്തിലേക്ക് വെള്ളം കുടിപ്പിച്ചു കൊണ്ടുപോയ പുഴ.
മണല്‍ മാഫിയക്കാരുടെ കരളായ പുഴ.
വിഷമദ്യ ദുരന്തം ഉണ്ടായ സ്ഥലം.
ഇങ്ങിനെ കുറ്റിപ്പുറത്തിന് വിശേഷണങ്ങള്‍ നിരവധിയാണ്...

പക്ഷെ കഴിഞ്ഞ ഒരു മാസമായി കുറ്റിപ്പുറം പ്രശസ്തിയിലേക്ക് വന്നു കൊണ്ടിരിക്കുന്നത് മറ്റൊരു വിഷയത്തിലാണ്.
കാമുകന്മാരുടെ പേരില്‍....
സംസ്ഥാനത്തിന്റെ വിവിധ ഭാഗങ്ങളില്‍ നിന്നും തങ്ങളുടെ കാമുകനെ തേടി വിവാഹിതകളും, അവിവാഹിതകളും, രണ്ടും മൂന്നും പെറ്റവരും (കൃഷ്ണയ്യര്‍ വക്കീല് കേള്‍ക്കെണ്ടാ) കുറ്റിപ്പുറത്തെത്തി തങ്ങളുടെ കാമുകന്മാരെ അന്വേഷിച്ചു കൊണ്ടിരിക്കുന്നു.

ഇന്നലെ ഒരു പതിനേഴുകാരി...
രണ്ടു ദിവസം മുന്‍പ്‌ തൃത്താലയിലെ ഒരു വീട്ടമ്മ...
കഴിഞ്ഞ ആഴ്ച തൃശൂരിലെ ഒരു മെഡിക്കല്‍ കോളേജ്‌ വിദ്യാര്‍ഥിനി...

അടുത്ത ദിവസങ്ങളില്‍ ആയി ഇത്തരത്തില്‍ പത്തിലധികം സംഭവങ്ങള്‍ ഉണ്ടായതായി പോലീസ്‌ തന്നെ സാക്ഷ്യപ്പെടുത്തുന്നു.
ഇപ്പോള്‍ ഈ വിഷയം സ്പെഷ്യല്‍ ബ്രാഞ്ച് അന്വേഷിക്കുന്നുണ്ടത്രേ.

ഇവിടെയെല്ലാം വില്ലനായത്‌, അല്ലെങ്കില്‍ കാമുകനെയും കാമുകിയും കൂട്ടി മുട്ടിച്ചത്‌ നമ്മുടെ എല്ലാം കയ്യിലുള്ള ആ ചെറിയ കുന്ത്രാണ്ടം ആണ് - മൊഫൈല്‍ ബോണ്‍.
ഒരുപാട് കുടുംബങ്ങള്‍ കലക്കുന്നതില്‍ നിര്‍ണായക പങ്കുവഹിച്ച ആ യന്ത്രം തന്റെ പ്രവര്‍ത്തി തുടര്‍ന്ന് കൊണ്ടിരിക്കുന്നു.

എത്ര ശ്രദ്ധിക്കാന്‍ പറഞ്ഞാലും, അല്പം പോലും ശ്രദ്ധിക്കാതെ "മൊബൈല്‍ ഫോണ്‍ എന്നെക്കാള്‍ നന്നായി എന്റെ കുട്ടി കൈകാര്യം ചെയ്യും" എന്ന്  വീമ്പടിക്കുന്ന, മക്കളുടെ കയ്യിലെ മൊബൈല്‍ സ്റ്റാറ്റസിന്റെ പ്രതീകമായി കാണുന്ന ആധുനിക രക്ഷിതാക്കള്‍.

എത്ര കേട്ടാലും, കണ്ടാലും, അനുഭവിച്ചാലും തിരുത്താന്‍ തയ്യാറാകാത്ത പ്രബുദ്ധരായ മലയാളികളും....!!!

അബസ്വരം :
നിങ്ങള്‍ക്ക്‌ തോന്നുന്നുണ്ടാവും ഈ മൊബൈല്‍ പ്രശ്നം ചൂണ്ടിക്കാട്ടാന്‍ മാത്രമാണ് ഞാന്‍ പോസ്റ്റ്‌ ഇട്ടത് എന്ന്....
അല്ല മക്കളേ അല്ല....
എനിക്കും ഉണ്ട് ഒരു മൊബൈല്‍ ഫോണ്‍.
കറന്റ് നല്‍കിയും, റീച്ചാര്‍ജ് നല്‍കിയും ഞാന്‍ തീറ്റി പോറ്റുന്ന ഒന്ന്.
എന്നിട്ടും അതിലേക്ക് ഒരുത്തിയും വിളിക്കുന്നില്ല.
എന്റെ ഏറ്റവും അടുത്ത റെയില്‍വേ സ്റ്റേഷന്‍ കുറ്റിപ്പുറം ആയിരുന്നിട്ട് കൂടി.
അതാ ഞമ്മടെ നിരാശ.....