പുതിയ കുരങ്ങനും പഴയ തൊപ്പിയും

ഈ കഥയുടെ ആദ്യഭാഗം നിങ്ങള്‍ കേട്ടിട്ടുള്ളതാണ്.

കാലങ്ങള്‍ കഴിഞ്ഞു പോയി.
രാമു രോഗശയ്യയിലായി.
തൊപ്പി കച്ചവടം എന്ന കുലത്തൊഴില്‍ രാമു മകന്‍ ബാലുവിനെ ഏല്‍പ്പിച്ചു.

മരണ ശയ്യയില്‍ വെച്ച് രാമു ബാലുവിനോട് പറഞ്ഞു.
"മോനേ ബാലൂ... നീ വനത്തിനരികിലൂടെ തൊപ്പികളുമായി നടന്നു പോകുമ്പോള്‍ അവിടെ കുരങ്ങന്മാര്‍ ഉണ്ടാകും. അവ നിന്റെ തൊപ്പി തട്ടിയെടുത്താല്‍, നിന്റെ തലയില്‍ വെക്കുന്ന തൊപ്പി എടുത്ത് കുരങ്ങനെ എറിയുക. അപ്പോള്‍ കുരങ്ങന്‍ തട്ടി എടുത്ത തൊപ്പിസഞ്ചി കൊണ്ട് തിരിച്ചെറിയും."

അധികം വൈകാതെ രാമു ഇഹലോകത്തുനിന്നും വിടവാങ്ങി.

ബാലു തൊപ്പി കച്ചവടം ആരംഭിച്ചു.

ഒരു ദിവസം ബാലു തൊപ്പികളുമായി വനത്തിനരികിലൂടെ നടന്നു പോകുമ്പോള്‍ ഒരു കുരങ്ങന്‍ ബാലുവിന്റെ സഞ്ചി തട്ടിയെടുത്ത് മരത്തില്‍ കയറി.

ബാലുവിന്റെ മനസ്സിലേക്ക് തന്റെ പിതാവിന്റെ ഉപദേശം കടന്നു വന്നു.
ബാലു തന്റെ തലയില്‍ ഉള്ള തൊപ്പി എടുത്ത് കുരങ്ങന് നേരെ എറിഞ്ഞു.
കുരങ്ങന്‍ ആ തൊപ്പി പിടിച്ചെടുത്തു.

എന്നാല്‍ കുരങ്ങന്‍ സഞ്ചി കൊണ്ട് ബാലുവിനു നേരെ എറിഞ്ഞില്ല.

എന്തുചെയ്യണമെന്നറിയാതെ ബാലു അന്തം വിട്ടു നില്‍ക്കുമ്പോള്‍ കുരങ്ങന്‍ പറഞ്ഞു.
"എന്റെ അച്ഛനും മരണ കിടക്കയില്‍വെച്ച് എന്നെ ഉപദേശിച്ചിരുന്നു. ഇനി ഒരിക്കലും ആ തെറ്റ് നമ്മുടെ തറവാട്ടുകാര്‍ ആവര്‍ത്തിക്കരുത് എന്ന് അച്ഛന്‍ എന്നെ ഉപദേശിച്ചു. അതുകൊണ്ട് ഞാന്‍ തൊപ്പിസഞ്ചി തിരിച്ചെറിയും എന്ന് വിചാരിച്ച് കാത്തു നില്‍ക്കേണ്ട പൊട്ടാ....."


ഈ പോസ്റ്റ്‌ മോഷ്ടിക്കരുതെന്ന് ബൂലോക കള്ളന്മാരെ ഓര്‍മ്മപ്പെടുത്തുന്നു 

എന്റെ കൂടുതല്‍ കത്തികള്‍ വായിക്കാനായി ഇവിടെ ക്ലിക്കുക