പതിനാറിലെ നിക്കാഹും, സാമൂഹിക പരിഷ്കര്‍ത്താക്കളും

ഓണ്‍ ലൈന്‍ ലോകത്തെ ഇപ്പോഴത്തെ പ്രധാന ചര്‍ച്ചാ വിഷയം പതിനാറുകാരിയായ മുസ്ലിം പെണ്‍കുട്ടികളുടെ നിക്കാഹ് ആണല്ലോ !!! "പതിനാറു വയസ്സുള്ള മുസ്ലിം പെണ്‍കുട്ടിയുടെ വിവാഹം നടത്താം" എന്ന സര്‍ക്കാര്‍ തീരുമാനം ആണല്ലോ വിവാദം ആയിരിക്കുന്നത്.

ഈ വിഷയത്തെ രണ്ടു തലത്തില്‍ നോക്കിക്കാണേണ്ടതുണ്ട്.

ആദ്യമായി ഏതെങ്കിലും മുസ്ലിം സംഘടന ഈ നിയമത്തിനായി സര്‍ക്കാരിനെ സമീപിച്ചിരുന്നോ എന്ന് പരിശോധിക്കുകയാണ് വേണ്ടത്. അങ്ങിനെ ഒരു ആവശ്യം ഒരു സംഘടനയും മുന്നോട്ട് വെച്ചിട്ടില്ല എന്നാണ് അബസ്വരന്‍ മനസ്സിലാക്കുന്നത്. ഇനി അങ്ങനെ വല്ല സംഘടനയും ഈ ആവശ്യം മുന്നോട്ട് വെച്ചിട്ടുണ്ട് എങ്കില്‍ അതിന്റെ വിശദാംശങ്ങള്‍ നല്‍കാന്‍ അഭ്യര്‍ത്ഥിക്കുന്നു.

ഇത്തരം ഒരു നിയമം വിവാദമാക്കുക വഴി എല്ലാ ഇസ്ലാം മത വിശ്വാസികളായ രക്ഷിതാക്കളും പതിനാറു വയസ്സ് ആയ പെണ്‍കുട്ടികളെ കെട്ടിക്കാനും, മാപ്പിള ചെക്കന്മാര്‍ പതിനാറു വയസ്സ് ആയവരെ കെട്ടാനും മുട്ടി നില്‍ക്കുകയാണ് എന്ന ഒരു തെറ്റായ സന്ദേശം ആണ് സമൂഹത്തിനു നല്‍കുന്നത്.

പതിനെട്ട് വയസ്സാണ് ഇന്ത്യയില്‍ വിവാഹം ചെയ്യാനുള്ള വയസ്സായി കണക്കാക്കുന്നത് എങ്കില്‍ ആ നിയമം പിന്തുടരുന്നതില്‍ ഇസ്ലാമികമായി ഒരു തെറ്റും ഇല്ല. കാരണം പ്രായപൂര്‍ത്തിയായ ശേഷം വിവാഹം കഴിക്കണം എന്നാണു ഇസ്ലാം പഠിപ്പിക്കുന്നത്. അതിലൂടെ പ്രായപൂര്‍ത്തി ആവുന്നതിനു മുന്‍പുള്ള ശൈശവ വിവാഹങ്ങള്‍ പാടില്ല എന്ന നിലപാട് കൂടിയാണ് ഇസ്ലാം സ്വീകരിക്കുന്നത് എന്ന് സാമാന്യ ബോധം ഉള്ളവര്‍ക്ക് മനസ്സിലാവും. പ്രായപൂര്‍ത്തി ആയതിനു ശേഷം എപ്പോള്‍ വേണം എങ്കിലും വിവാഹം ആകാം എന്ന് ഇസ്ലാം പഠിപ്പിക്കുകയും, പതിനെട്ട് വയസ്സ് ആയ ശേഷം കെട്ടിച്ചാല്‍ മതി എന്ന നിയമം ഇന്ത്യാ മഹാരാജ്യം നടപ്പിലാക്കുകയും ചെയ്‌താല്‍ അതില്‍ കുഴപ്പമോ, ഇസ്ലാം വിരുദ്ധതയോ  കാണേണ്ടതുണ്ട് എന്ന് തോന്നുന്നില്ല. കാരണം "പതിനാറു വയസ്സ് ആയ ഉടനെ പെണ്‍കുട്ടികളെ വിവാഹം കഴിച്ചു കൊടുത്തേ തീരൂ" എന്ന നിബന്ധന ഇസ്ലാമില്‍ ഇല്ല എന്നത് തന്നെ.

ഈ നിയമം വന്നപ്പോഴേക്കും മുസ്ലിം പെണ്‍കുട്ടികളുടെ വിമോചക വേഷം കെട്ടി പലരും ഇസ്ലാം വിരോധ പോസ്റ്റുകളുമായി രംഗത്ത് എത്തിക്കഴിഞ്ഞു. കിട്ടിയ ചാന്‍സില്‍ ഇസ്ലാമിനെ കുറിച്ച് നാല് ചീത്ത പറയുക എന്നതില്‍ കവിഞ്ഞ് എന്ത് മഹത്ത് ലക്ഷ്യമാണ്‌ ഇവര്‍ക്കുള്ളത് ?

ഇനി ഇതിന്റെ മറുവശം നോക്കാം...
ഇസ്ലാം മത വിശ്വാസ പ്രകാരം, ഒരു സ്ത്രീക്ക് ആര്‍ത്തവം ആരംഭിച്ചാല്‍ അവള്‍ പ്രായപൂര്‍ത്തിയായി. അവള്‍ വിവാഹത്തിനു യോഗ്യയും ആയി. ഒരു മതേതര രാജ്യമായ ഇന്ത്യയില്‍ ഓരോ മത വിശ്വാസികള്‍ക്കും അവരവരുടെ വിശ്വാസവും, ആചാരങ്ങളും അനുഷ്ഠിക്കാന്‍ ഉള്ള സ്വാതന്ത്ര്യം ഉണ്ട്. അതുകൊണ്ട് തന്നെ ഇസ്ലാമിക വിശ്വാസ പ്രകാരം ആര്‍ത്തവം തുടങ്ങി പ്രായപൂര്‍ത്തിയായ പെണ്‍കുട്ടിയെ വിവാഹം ചെയ്ത് കൊടുക്കാനുള്ള അവകാശം നിഷേധിക്കപ്പെട്ടാല്‍ അത് ഇന്ത്യ മഹനീയമായി വാഴ്ത്തപ്പെടുന്ന മതേതരത്വം എന്ന നിലപാടില്‍ നിന്നും ഉള്ള ഒളിച്ചോട്ടമാണ്. മതേതരത്വം എന്നത് എല്ലാ മതവിശ്വാസികളും ഒരേ സിവില്‍ കോഡ് പിന്തുടരണം എന്നതല്ലല്ലോ !!!

ഇതിനു അനുകൂലമായ കോടതി വിധികള്‍ മുന്‍പും ഉണ്ടായിട്ടുണ്ട്. മുസ്‌ലിം പെണ്‍കുട്ടികളുടെ വിവാഹപ്രായം ഋതുമതിയാവലാണെന്നും 18 വയസ് തികയേണ്ടതില്ലെന്നും 2012 മെയ് മാസം ഡല്‍ഹി ഹൈക്കോടതി വിധി പ്രസ്താവിച്ചു. ശുമൈല(15 വയസ്) എന്ന പെണ്‍കുട്ടിയെ തട്ടികൊണ്ടുപോയ സംഭവത്തെ സംബന്ധിച്ചുള്ള കേസില്‍ ഡല്‍ഹി ഹൈക്കോടതി ജസ്റ്റിസുമാരായ ജസ്റ്റിസ് രവീന്ദ്രഭട്ട്, ജസ്റ്റിസ് എസ്.പി.ഗാഗ് എന്നിവരാണ് സുപ്രധാനമായ ഈ വിധി പുറപ്പെട്ടുവിച്ചത്.

ഇതിനോടൊപ്പം പറയേണ്ട മറ്റൊരു കാര്യം ഉണ്ട്. ഒരു പെണ്‍കുട്ടിയുടെ വിവാഹം നടത്തണം എങ്കില്‍ അവളുടെ പൂര്‍ണ്ണ സമ്മതം വേണം എന്നാണ് ഇസ്ലാം പഠിപ്പിക്കുന്നത്. അതുകൊണ്ട് തന്നെ പ്രായപൂര്‍ത്തിയായ പെണ്‍കുട്ടിയുടെ സമ്മതം ഇല്ലാതെ വിവാഹം ചെയ്ത് നല്‍കിയാല്‍ അത് തെറ്റാണ്.

പതിനാറു വയസ്സില്‍ വിവാഹം കഴിക്കുന്നതിനെ വിമര്‍ശിക്കുന്നതിനു ഭൂരിപക്ഷം പേരും ഉപയോഗിക്കുന്ന ചില വാദങ്ങള്‍ ബാലിശമാണ്. പെണ്‍കുട്ടിയുടെ ഗര്‍ഭപാത്രത്തിന്റെ വളര്‍ച്ച കുറവും, കുട്ടിക്കളിയും ഒക്കെയാണ് ഇതിനു ഉദാഹരണമായി ഇത്തരം മഹാന്മാര്‍ എടുത്ത് പറയാറുള്ളത്. എന്നാല്‍ ഒരു സ്ത്രീക്ക് ആര്‍ത്തവം ആരംഭിക്കുന്നതോടെ അവളുടെ ശരീരം ഗര്‍ഭം ധരിക്കാന്‍ സജ്ജമായി കഴിഞ്ഞു. പതിനാറു വയസ്സില്‍ കെട്ടിച്ചു ഗര്‍ഭിണി ആയി 'എന്നത് കൊണ്ട് മാത്രം' ഒരു പ്രശ്നവും പ്രസവത്തില്‍ ഉണ്ടാകാന്‍ പോകുന്നില്ല. ഇരുപതിലും മുപ്പതിലും ഗര്‍ഭിണി ആയാലും ചില ആളുകളില്‍ പ്രസവവുമായി ബന്ധപ്പെട്ട പ്രശ്നങ്ങള്‍ ഉണ്ടാവുകയും ചെയ്യും. ഇതൊക്കെ ഓരോ ശരീരപ്രകൃതിയുമായി ബന്ധപ്പെട്ട കാര്യങ്ങളാണ്.

പിന്നെ കുട്ടിക്കളി എന്നത് ആപേക്ഷികം ആണ്. പതിനാറു വയസ്സുള്ള കുട്ടികള്‍ എല്ലാം ഓലപ്പന്തും, പീപ്പിളിയും, കളിപ്പാട്ടങ്ങളും ഉണ്ടാക്കി നടക്കുകയാണ് എന്നാണോ ഇത്തരക്കാര്‍ പറയുന്നത് ?? ഇരുപത് കഴിഞ്ഞ പല കുട്ടികളും പക്വത ഇല്ലാതെ പെരുമാറാറില്ലേ ? ചില ചെറിയ കുട്ടികള്‍ പോലും പക്വതയോടെ പെരുമാറുകയും ചെയ്യുന്നത് കണ്ടിട്ടില്ലേ ? പക്വത എല്ലാം ഓരോ വ്യക്തിക്കും അനുസരിച്ചു വ്യത്യാസപ്പെട്ടിരിക്കും എന്ന് പ്രത്യേകം എടുത്ത് പറയേണ്ടതുണ്ടോ ?

പതിനെട്ട് വയസ്സായി എന്നത് കൊണ്ടും കുടുംബ ജീവിതം എന്താണ് എന്നൊക്കെ ചിന്തിക്കാന്‍ എല്ലാവര്‍ക്കും കഴിഞ്ഞു കൊള്ളണം എന്നില്ല. കുടുംബ ജീവിതത്തിലേക്ക് പ്രവേശിക്കുമ്പോള്‍ ആണ് ഭൂരിപക്ഷം പേരും കുടുംബ ജീവിതം എന്താണ് എന്ന് മനസിലാക്കുക. അത് പ്രായം പതിനാറു ആയാലും പതിനെട്ടു ആയാലും ഒരുപോലെ തന്നെ.

മറ്റൊരു കാരണമായി പറയുന്നത് ലൈംഗികമായ വിഷയങ്ങളില്‍ കുട്ടികള്‍ക്ക് അറിവില്ല എന്നതാണ്. ഇതും ഒരു തെറ്റിധാരണയാണ്. ഇന്നത്തെ കുട്ടികള്‍ ചാനലുകളുടെയും, മറ്റു മാധ്യമങ്ങളുടെയും സ്വാധീനത്തില്‍ ആണ്. ഇത്തരം കാര്യങ്ങള്‍ പാഠപുസ്തകത്തിലും ഉള്‍പ്പെടുത്തിയിട്ടുണ്ട്. അത് കൊണ്ട് തന്നെ വിവാഹത്തെ കുറിച്ചും, മറ്റും വ്യക്തമായ ധാരണയുള്ളവര്‍ തന്നെയാണ് ഭൂരിപക്ഷം കുട്ടികളും. സംശയം ഉണ്ടെങ്കില്‍ ഹൈസ്കൂള്‍ ക്ലാസുകളിലെ ബയോളജി പുസ്തകങ്ങളിലൂടെ ഒന്ന് കണ്ണോടിക്കുക.

ലൈംഗിക തൃഷ്ണ മനുഷ്യന്റെ ജനിതമായ ഒരു സവിശേഷതയാണ്. അത് ആണിലും, പെണ്ണിലും ഒരു പോലെ ഉണ്ട് എന്നതും വസ്തുതയാണ്. സ്ത്രീ പീഡനങ്ങളും, വഴിവിട്ട ബന്ധങ്ങളും അരങ്ങു വാഴുന്ന ഇന്നത്തെ കാലത്ത് ഓരോരുത്തര്‍ക്കും കഴിയുന്നത്ര വേഗത്തില്‍ ഒരു ഇണ ഉണ്ടാവുകയല്ലേ നല്ലത് ??? ലൈംഗികത  എന്തെന്ന് അറിയാനുള്ള ജിജ്ഞാസ സജീവമായി നില്‍ക്കുന്ന കാലമായ യുവത്വത്തിന്റെ തുടക്കത്തില്‍ അവരുടെ ലൈംഗികതയെ നിയന്ത്രിക്കാന്‍ സാധിക്കുന്നില്ലെങ്കില്‍ അത് ധാര്‍മികാധപതനത്തിലേക്കാണ് സമൂഹത്തെ നയിക്കുക. അതുകൊണ്ടു തന്നെ ഈ സമയത്ത് വിവാഹം കഴിക്കുന്നത് ഈ വൈകാരികത ഭാര്യാഭര്‍ത്താക്കന്മാര്‍ക്ക് പരസ്പരം പങ്കുവെക്കാന്‍ സഹായിക്കുന്നു. അതുപോലെ ആണും പെണ്ണും കുടുംബത്തിനും വിവാഹത്തിനും പുറത്ത് ലൈംഗികത പരീക്ഷിക്കുന്നതില്‍ നിന്ന് വിട്ടുനില്‍ക്കുകയും ചെയ്യുന്നു. കാത്തു കാത്തുവെച്ചു അവസാനം ചീത്തപ്പേര് കേള്‍പ്പിക്കാന്‍ നില്‍ക്കണോ ?

വാര്‍ത്താവിനിമയ മാധ്യമങ്ങളും മീഡിയകളും ഇത്രയും വികസിച്ച കാലത്ത് യുവത്വത്തിന്റെ ചോരത്തിളപ്പിനെ ചൂഷണം ചെയ്യാനും ഉപയോഗപ്പെടുത്താനും ധാരാളം മാഫിയകള്‍ തന്നെ പ്രവര്‍ത്തിക്കുന്നുണ്ട്. കൗമാരക്കാരെ ലൈംഗികമായും സാമ്പത്തികമായും അവര്‍ ഉപയോഗിക്കുന്നുണ്ട്. യുവതീ-യുവാക്കളെ ഇത്തരം മാഫിയകളുടെ പിടിയില്‍ നിന്ന് രക്ഷിക്കാനും ഈ പ്രായത്തിലുള്ള വിവാഹം സഹായിക്കും. അല്ലാഹു പഠിപ്പിച്ചത് പോലെ സ്‌നേഹവും കാമവും പ്രണയവുമെല്ലാം അനുഭവിക്കാനുള്ള നിയമപരമായ മാര്‍ഗമാണ് വിവാഹം. പ്രായത്തിന്റെയും വികാരത്തിന്റെയും അപക്വതയില്‍ നിന്ന് രക്ഷ നേടാവുന്ന സമാധാനത്തിന്റെ കേന്ദ്രവുമാണിത്. അല്ലാഹു പറയുന്നു: "അല്ലാഹു നിങ്ങളുടെ വര്‍ഗത്തില്‍ നിന്നുതന്നെ നിങ്ങള്‍ക്ക് ഇണകളെ സൃഷ്ടിച്ചുതന്നു. അവരിലൂടെ ശാന്തി തേടാന്‍. നിങ്ങള്‍ക്കിടയില്‍ സ്‌നേഹവും കാരുണ്യവും ഉണ്ടാക്കി. ഇതൊക്കെയും അല്ലാഹുവിന്റെ ദൃഷ്ടാന്തങ്ങളില്‍ പെട്ടവയാണ്. സംശയമില്ല; വിചാരശാലികളായ ജനത്തിന് ഇതിലെല്ലാം നിരവധി തെളിവുകളുണ്ട്."
(വിശുദ്ധ ഖുര്‍ആന്‍ - 30:21)

പിന്നെ വിമര്‍ശകര്‍ ഉന്നയിക്കുന്ന ഒരു കാര്യം വിവാഹ ശേഷം വിദ്യാഭ്യാസം തടയപ്പെടുന്നു എന്നതാണ്. ഇത് വസ്തുതാവിരുദ്ധമായ കാര്യമാണ്. എത്രയോ പേര്‍ വിവാഹ ശേഷം പഠിക്കുകയും, ജോലി ചെയ്യുകയും ചെയ്യുന്നുണ്ട്. സ്വന്തം രക്ഷിതാക്കളേക്കാള്‍, ഭര്‍ത്താക്കന്മാര്‍ പഠനത്തിനും ജോലിക്കും വിടാന്‍ ഉത്സാഹിക്കുന്നവരായുണ്ട്. ചില കേസുകളില്‍ തിരിച്ചും ഉണ്ടാകാം. അങ്ങിനെ നോക്കുകയാണെങ്കില്‍ പതിനെട്ട് കഴിഞ്ഞു വിവാഹം നടത്തിയവര്‍ എല്ലാം തുടര്‍ പഠനത്തിനു പോവുകയും, ജോലിക്ക് പോവുകയും ചെയ്യുന്നുണ്ടോ എന്ന് സ്വയം ചിന്തിച്ചു നോക്കിയാല്‍ മതി. പഠനം തുടരുമോ, ജോലിക്ക് പോകുമോ എന്നതൊക്കെ ഓരോ ഭര്‍ത്താവിനേയും, കുടുംബത്തേയും ഒക്കെ അനുസരിച്ച് ഇരിക്കും. ആവശ്യം എങ്കില്‍ ഈ വിഷയങ്ങളില്‍ എല്ലാം മുന്‍ധാരണകളില്‍ എത്തിയ ശേഷം മതിയല്ലോ വിവാഹത്തിലേക്ക് കടക്കുന്നത്.

ചിലരുടെ പറച്ചില്‍ കേട്ടാല്‍ തോന്നും പതിനാറു വയസ്സിനുള്ള വിവാഹം എല്ലാം കുഴപ്പത്തില്‍ ചെന്ന് ചാടുകയും, പതിനെട്ട് വയസ്സിനു ശേഷം ഉള്ള വിവാഹങ്ങള്‍ എല്ലാം സന്തോഷകരമായി മുന്നോട്ട് പോവുകയും ആണ് ചെയ്യുന്നത് എന്ന്. ഇത് വെറും കണ്ണടച്ചു ഇരുട്ടാക്കല്‍ മാത്രമാണ്.

പതിനാറു വയസ്സുള്ള പെണ്‍കുട്ടികളെ പിച്ചി ചീന്താന്‍ വിട്ടു കൊടുക്കുകയാണ് എന്നാണു ചില പണ്ഡിതന്മാരുടെ നിരീക്ഷണം. ഇനി ഒരു കാര്യം പറയാം, ഇരുപത്തിനാല് വയസ്സ് ഉള്ളപ്പോള്‍ എന്റെ ഉപ്പ പതിനഞ്ചു വയസ്സ് ഉള്ള എന്റെ ഉമ്മയെ പിച്ചിചീന്തിയാണ് ഞാനും എന്റെ സഹോദരിമാരും ജനിച്ചത്. പിച്ചിചീന്തിയ ഉപ്പയും, ഇരയാക്കപ്പെട്ട ഉമ്മയും സുഖമായി ജീവിക്കുന്നു !!!

ഇത്രയും വായിച്ചു, അബസ്വരന്‍ എല്ലാവരേയും പതിനാറു വയസ്സില്‍ കെട്ടിച്ചു വിടാന്‍ നോക്കുകയാണ് എന്ന് തെറ്റിദ്ധരിക്കേണ്ട. പതിനാറില്‍ ആയാലും പതിനെട്ടില്‍ ആയാലും വലിയ മാറ്റങ്ങള്‍ ഉണ്ട് എന്ന് ഞാന്‍ വിശ്വസിക്കുന്നില്ല എന്ന് മാത്രം.

അബസ്വരം :
പ്രായമല്ല, മന:പ്പൊരുത്തം ആണ് പ്രധാനം.