Dr. സക്കീനയുടെ ചികിത്സാ വിധികള്‍ അഥവാ തട്ടിപ്പുകള്‍

ഇതൊരു യഥാര്‍ത്ഥ സംഭവമാണ്. എന്നാല്‍ ഇതിലെ വ്യക്തികളുടെ പേരുകളില്‍ മാറ്റം വരുത്തിയിട്ടുണ്ട്. പേരുകളില്‍ മാറ്റം വരുത്താന്‍ മറ്റൊന്നുമല്ല കാരണം, കയ്യും കാലും ഒടിഞ്ഞ് ആശുപത്രിയില്‍ കിടക്കേണ്ടി വരുന്നത് എന്നെ സംബന്ധിച്ചിടത്തോളം  മഹാബോറ് ആയ പരിപാടി ആയതുകൊണ്ടാണ്‌ പേരുകളില്‍ മാറ്റം വരുത്തുന്നത്.

സക്കീന എന്ന് ഇതിലെ മുഖ്യ വ്യക്തിയെ വിളിക്കാം. സക്കീനയുടെ സ്വന്തം ഭാഷയില്‍ പറഞ്ഞാല്‍ "ഡോക്ടര്‍ സക്കീന". നല്ല രീതിയില്‍ ജീവിക്കുന്ന സക്കീനമാര്‍ പേര് ദുരുപയോഗപ്പെടുത്തിയതിനു എന്നോട് സദയം ക്ഷമിക്കുമല്ലോ.

സക്കീനയുടെ പ്രധാന പരിപാടി മലബാറില്‍ മൂലക്കുരു ചികിത്സയാണ്. മലബാറില്‍ എന്ന് പറഞ്ഞാല്‍ പ്രത്യേകിച്ച് കോഴിക്കോടും, മലപ്പുറവും. ബി എ എം എസ് ആണ് തന്റെ വിദ്യാഭ്യാസ യോഗ്യത എന്ന് സ്വയം പ്രഖ്യാപിച്ചാണ് സക്കീന രോഗികളെ ആകര്‍ഷിക്കുന്നത്. 'മൂലക്കുരുവിന് നിത്യശാന്തി ആയുര്‍വേദത്തിലൂടെ നല്‍കാം' എന്നതാണ് ആപ്ത വാക്യം. ചെലവ് പതിനായിരം രൂപ മുതല്‍ പതിനയ്യായിരം വരെ. ഇത് സാധാരണക്കാരന് പുണ്യ പ്രവര്‍ത്തിയുടെ ഭാഗമായി നല്‍കുന്ന സൗജന്യ നിരക്ക് (സക്കീനയുടെ ഭാഷയില്‍ ലാഭം എടുക്കാതെയുള്ള ചെലവ്). പണക്കാര്‍ക്ക് നിരക്ക് വീണ്ടും ഉയരും, രോഗി വരുന്ന കാറിന്റെ വിലക്ക് ആനുപാതികമായി.

ആയുര്‍വേദത്തില്‍ മൂലക്കുരു (അര്‍ശ്ശസ്) വിനെ മഹാരോഗങ്ങളുടെ പട്ടികയില്‍ ആണ് ഉള്‍പ്പെടുത്തിയിട്ടുള്ളത്. അതായത് ഭക്ഷണം നിയന്ത്രിക്കുകയും, പഥ്യം പാലിക്കുകയും,  മരുന്നുകള്‍ കൃത്യമായി കഴിക്കുകയും ചെയ്‌താല്‍ വലിയ ശല്യം ഇല്ലാതെ മുന്നോട്ട് പോകാം. പൂര്‍ണ്ണ ശമനം എന്ന അവസ്ഥ ഉണ്ടാകാനുള്ള സാധ്യത വളരെ വിരളമാണെന്ന് ചുരുക്കം (ആരംഭ ദശയില്‍ ചിലപ്പോള്‍ പൂര്‍ണ്ണ ശമനവും ലഭിക്കാറുണ്ട്. പക്ഷേ അപൂര്‍വമായി മാത്രം).

ഞാന്‍ വിസിറ്റിംഗ് ഫിസിഷ്യന്‍ ആയി ജോലി ചെയ്തിരുന്ന ഒരു ആയുര്‍വേദ ആശുപത്രിയില്‍ സക്കീനയും വിസിറ്റിംഗ് ഫിസിഷ്യന്‍ ആയി എത്തുന്നതോടെയാണ് ഈ പോസ്റ്റിന് ആധാരമായ സംഭവങ്ങള്‍ ആരംഭിക്കുന്നത്.

'പിന്നാമ്പുറ വാതിലിന്റെ' രോഗം എല്ലാവര്‍ക്കും ഒരു തലവേദനയാണല്ലോ. മുതലാളിമാര്‍ ആണെങ്കില്‍ ഈ രോഗ കാര്യത്തില്‍ മുന്നിലുമാണ്. അങ്ങിനെ ചികിത്സക്ക് ആളുകള്‍ വരാന്‍ തുടങ്ങി. സക്കീന ആദ്യം തന്നെ ഒരു കണ്ടീഷന്‍ ആശുപത്രി മുതലാളിയുമായി ഉണ്ടാക്കിയിരുന്നു - അവള്‍ ചികിത്സ നടത്തുമ്പോള്‍ മറ്റാരേയും ആ മുറിയിലേക്ക് പ്രവേശിപ്പിക്കില്ല, ഒരു സഹായിയെ പോലും. മുറിയില്‍ രോഗിയും സക്കീനയും മാത്രം. തന്റേത് ഒരു പ്രത്യേക ചികിത്സാ രീതി ആയതുകൊണ്ട് രഹസ്യം പുറത്ത് പോകാതിരിക്കാനാണ്‌ ഈ വ്യവസ്ഥ എന്നും സക്കീന ആശുപത്രി മുതലാളിയോട് പറഞ്ഞു. 'വേദനയില്ലാത്ത സര്‍ജറി' എന്നാണ് സക്കീന ആ ചികിത്സാ രീതിയെ വിശേഷിപ്പിച്ചിരുന്നത്. ആസ്ത്രേലിയയില്‍ നിന്നും ഇറക്കുമതി ചെയ്ത 'ഒരു സാധനം' ആണ് ഇതിനായി ഉപയോഗിക്കുന്നതെന്നും, അതിന്റെ വിലയാണ് പതിനായിരം എന്നും അവള്‍ പറഞ്ഞു. അവര്‍ ആ ആശുപത്രിയില്‍ വെച്ച് ഒരു രോഗിക്ക് ചികിത്സ നടത്തിയാല്‍ അല്ലെങ്കില്‍ ആശുപത്രിയുടെ കെയറോഫില്‍ ഒരു രോഗി എത്തിയാല്‍ ആശുപത്രി മുതലാളിക്ക് സക്കീന രണ്ടായിരം രൂപ നല്‍കും.

ബാക്കി സക്കീനയും എടുക്കും. ചികിത്സക്ക് ശേഷം തുടര്‍ച്ചയായി കഴിക്കാന്‍ ഒരു സിറപ്പും രോഗിക്ക് നല്‍കും. ആയുര്‍വേദ ലേബല്‍ ഉള്ള, ഞാന്‍ ഇതുവരെ കണ്ടിട്ടില്ലാത്ത, കേട്ടിട്ടില്ലാത്ത, 200 ml ന് 600 രൂപ വിലയുള്ള ഒരു സിറപ്പ്. ഒപ്പം രോഗിക്ക് ഒരു ഉപദേശവും, "ദിവസവും അര മണിക്കൂര്‍ ഉപ്പിട്ട ചുടുവെള്ളത്തില്‍ പിന്‍ഭാഗ വാതില്‍ തുറന്ന് മുക്കി വെക്കണം".

ഈ ചികിത്സാവിധിയെ പറ്റി അറിയാന്‍ എനിക്കും താല്പര്യമായി. ഞാന്‍ കയ്യിലുള്ള ആയുര്‍വേദ കിത്താബുകളെല്ലാം പരതിയെങ്കിലും, ഇത്തരത്തില്‍ ഉള്ള ചികത്സാ വിധികളൊന്നും കണ്ടെത്താന്‍ കഴിഞ്ഞില്ല. പിന്നെ ആസ്ത്രേലിയന്‍ ഉല്‍പ്പന്നത്തെ കുറിച്ചറിയാന്‍ ഗൂഗിള്‍ അമ്മച്ചിയുടെ സഹായം തേടിയെങ്കിലും അമ്മച്ചിയും കൈമലര്‍ത്തി പരാജയം സമ്മതിച്ചു. ഇങ്ങിനെ ആയുര്‍വേദത്തില്‍  എനിക്കറിയാത്ത, അല്ലെങ്കില്‍ എനിക്ക് പഠിക്കാന്‍ കഴിയാതെ പോയ ഒരു കാര്യം മറ്റൊരാള്‍ വിറ്റ് കാശാക്കുന്നത്‌ കണ്ടപ്പോള്‍ എനിക്കുണ്ടായ അസൂയ ഞാന്‍ ഉള്ളിലൊതുക്കി കഴിഞ്ഞു.

സക്കീനയുടെ ചികിത്സക്ക് വിധേയമായ പല രോഗികളുമായും ഞാന്‍ സംസാരിച്ചു. അവര്‍ പറഞ്ഞു "ചികിത്സ നടത്തുമ്പോള്‍ വേദനയൊന്നും ഇല്ല. എന്തൊക്കെയോ അവിടെ ചെയ്യുന്ന പോലെ തോന്നും. അതിനു ശേഷം ടോയിലെറ്റില്‍ പോകാന്‍ പറയും. അപ്പോള്‍ ധാരാളം ചോര കട്ട കട്ടയായി പോകുന്നത് കാണാം. എന്നാല്‍ ഒട്ടും തന്നെ വേദനയില്ല."

"ഇഞ്ചെക്ഷന്‍ എടുക്കാറുണ്ടോ?" ഞാന്‍ അവരോട് ചോദിച്ചു.

"ഇല്ല. ഒരു സൂചി കുത്തുന്ന വേദനപോലും ഇല്ല. എന്നോട് കണ്ണടച്ച് കമഴ്ന്നു കിടക്കാന്‍ പറഞ്ഞു. ഞാന്‍ അങ്ങിനെ കിടന്നു. വേറെ ഒന്നും എനിക്കറിയില്ല." രോഗി പറഞ്ഞു.

"ചികിത്സക്കായി ഏകദേശം എത്ര സമയം എടുക്കും?" ഞാന്‍ അന്യേഷിച്ചു.

"ഏകദേശം അര മണിക്കൂര്‍." രോഗി പറഞ്ഞു.

"രോഗത്തിന് എങ്ങിനെയുണ്ട്? ആശ്വാസം ഉണ്ടോ?"  ഞാന്‍ ചോദിച്ചു.

"കുറവുണ്ട്. ഒരു സിറപ്പ് തുടര്‍ച്ചയായി കഴിക്കാന്‍ പറഞ്ഞിട്ടുണ്ട്. അത് കഴിക്കുമ്പോള്‍ കുഴപ്പമൊന്നും ഇല്ല. ഒരു ദിവസം മരുന്ന് മുടങ്ങിയപ്പോള്‍ കുറച്ച് ബുദ്ധിമുട്ട് തോന്നിയിരുന്നു." രോഗി വിശദീകരിച്ചു.

ലോക്കല്‍ അനസ്തേഷ്യയുടെ പോലും സഹായമില്ലാതെ, വേദനാരഹിതമായി നടത്തുന്ന സര്‍ജറി എന്നില്‍ അത്ഭുതമുളവാക്കി.

അങ്ങിനെ എന്നെ ആശ്ചര്യപ്പെടുത്തിക്കൊണ്ട് ദിവസങ്ങള്‍ കടന്നു പോയി. ഒരു ചെറുപ്പക്കാരന്‍ ചികിത്സക്കായി എത്തി. അവനെ തല്‍കാലം ഫിറോസ്‌ എന്ന് വിളിക്കാം.

ചികിത്സ കഴിഞ്ഞ് അടുത്ത ദിവസം ഫിറോസ്‌ ആശുപത്രിയില്‍ വന്ന് ബഹളം വെച്ചു.
 "എനിക്കവര്‍ ചികിത്സയൊന്നും നടത്തിയിട്ടില്ല. എന്റെ കയ്യില്‍ നിന്നും വാങ്ങിയ പതിനാലായിരം രൂപ തിരിച്ചു നല്‍കണം." ഫിറോസ്‌ ആവശ്യപ്പെട്ടു.

അവന്‍ വന്ന ദിവസം ഞാനോ, സക്കീനയോ അവിടെ ഉണ്ടായിരുന്നില്ല.

ആശുപത്രി മുതലാളി അവനോട് അടുത്ത ദിവസം വരാന്‍ പറഞ്ഞു.

അങ്ങിനെ അടുത്ത ദിവസം ഞാന്‍ ഉള്ള സമയത്ത് ഫിറോസ്‌ വന്നു. തന്റെ മുന്‍ നിലപാട് ആവര്‍ത്തിച്ചു.
"അവര്‍ ചികിത്സയൊന്നും ചെയ്തിട്ടില്ലെന്ന് നിനക്കെങ്ങിനെ മനസ്സിലായി?" ഞാന്‍ ഫിറോസിനോട്‌ ചോദിച്ചു.

ഫിറോസ്‌ : "ഞാന്‍ ഒരു അലോപ്പതി ആശുപത്രിയില്‍ പരിശോധന നടത്തിയ ശേഷമാണ് ഇവിടേക്ക് വന്നത്. ഇവിടത്തെ ചികിത്സക്ക് ശേഷം വീണ്ടും ആ ഡോക്ടറെ പോയി കണ്ടു. അദ്ദേഹം പറഞ്ഞു ഒന്നും ചെയ്തിട്ടില്ലാ എന്ന്."

അവന്റെ വാക്കുകള്‍ കേട്ടപ്പോള്‍ ഞാന്‍ മനസാ അവനെ അഭിനന്ദിച്ചു.

സക്കീന ചികിത്സ നടത്തിയ ഒരു രോഗിയുടെ പോലും പിന്‍ഭാഗം പരിശോധിക്കാനുള്ള സാമാന്യ ബുദ്ധി എന്റെ മണ്ടയില്‍ കത്തിയില്ലല്ലോ.

"നിങ്ങള്‍ സക്കീന ഉള്ള സമയത്ത് വന്ന് അവരോട് കാര്യം പറയൂ. അവരുടെ ചികിത്സയെ കുറിച്ചുള്ള വിശദീകരണം അവരാണ് നല്‍കേണ്ടത്." ഞാന്‍ ഫിറോസിനോട്‌ പറഞ്ഞു.

അങ്ങിനെ അവന്‍ സക്കീനയുള്ള സമയത്ത് വന്ന് പണം തിരികെ ചോദിച്ചു. ഉമ്മയുടെ സ്വര്‍ണ്ണം പണയം വെച്ചാണത്രേ ചികിത്സാ ചെലവ് അവന്‍ സംഘടിപ്പിച്ചത്. ചികിത്സ ഒന്നും നടത്താത്ത സാഹചര്യത്തില്‍ പണം മടക്കിക്കിട്ടിയേ തീരൂ എന്നാ നിലപാടില്‍ ഫിറോസ്‌ ഉറച്ചു നിന്നു. എന്നാല്‍ സക്കീന പണം മടക്കികൊടുക്കില്ല എന്ന നിലപാടാണ് സ്വീകരിച്ചത്. ആസ്ത്രേലിയന്‍ ഉല്പന്നം കൊണ്ടുവരാന്‍ ഉള്ള ചിലവുകളെ പറ്റി അവള്‍ വിശദീകരിച്ചു. എങ്കിലും ഫിറോസ്‌ തന്റെ നിലപാടില്‍നിന്നും പിന്മാറിയില്ല. ആശുപത്രി മുതലാളിയും പണം തിരികെ കൊടുത്ത് പ്രശ്നം ഒതുക്കാന്‍ സക്കീനയോട് ആവശ്യപ്പെട്ടെങ്കിലും അവള്‍ അതിനു വഴങ്ങിയില്ല. 
ഒടുവില്‍ ഫിറോസ്‌ പോലീസില്‍ പരാതി നല്‍കി.

അങ്ങിനെ ഒരു ദിവസം എസ് ഐ എന്നെ ഫോണില്‍ വിളിച്ചു.
മേല്‍ പറഞ്ഞ ആശുപത്രിയില്‍ ഞാന്‍ ജോലി ചെയ്യുന്നുണ്ടോ എന്ന് ചോദിച്ചു.
"ഉണ്ട്" ഞാന്‍ പറഞ്ഞു.
എസ് ഐ : "നിങ്ങള്‍ ആണോ ആ ചികിത്സ നടത്തിയത്?"
ഞാന്‍ : "ഞാനല്ല. ഫിറോസ്‌ എന്റെ പേരില്‍ ആണോ പരാതി തന്നിട്ടുള്ളത്?"
എസ് ഐ : "അല്ല. അവന്‍ സക്കീനയുടെ പേരിലാണ് പരാതി നല്‍കിയിട്ടുള്ളത്. പക്ഷെ സക്കീന മരുന്ന് എഴുതി കൊടുത്തിരിക്കുന്നത് നിങ്ങളുടെ പേരില്‍ ഉള്ള പ്രിസ്ക്രിപ്ഷന്‍ പാഡില്‍ ആണ്."

അതുകേട്ട് ഞാന്‍ ശരിക്കും ഞെട്ടി. "പടച്ചോനേ, എനിക്കിട്ടും പണി കിട്ടിയോ?"

"എന്റെ പ്രിസ്ക്രിപ്ഷന്‍ പാട് ഞാന്‍ കൈവശം വെച്ച് കൊണ്ടു നടക്കുന്നതല്ല. അത് ആശുപത്രിക്കാര്‍ അടിപ്പിച്ചു  നല്‍കിയതാണ്. ഞാന്‍ അവിടെ ഇരിക്കുമ്പോള്‍ അതില്‍ എഴുതും. അവിടെത്തന്നെ വെച്ച് പോരും. മറ്റാരെങ്കിലും അത് എടുക്കുന്നുണ്ടോ എന്ന് എനിക്ക് നോക്കാന്‍ കഴിയില്ല. നിങ്ങള്‍ക്ക് അതിലെ കയ്യെഴുത്തും ഒപ്പും എല്ലാം നോക്കിയാല്‍ അക്കാര്യം വെരിഫൈ ചെയ്യാമല്ലോ. ഞാന്‍ എഴുതിയ മറ്റു പ്രിസ്ക്രിപ്ഷനുകളുടെ കോപ്പി അവിടെ ഉണ്ടാകും." ഞാന്‍ എന്റെ ഭാഗം വ്യക്തമാക്കി.

എസ് ഐ : "നിങ്ങള്‍ എവിടെയാ പഠിച്ചത്?"

ഞാന്‍ : "കോയമ്പത്തൂരില്‍"

എസ് ഐ : "നിങ്ങളുടെ സര്‍ട്ടിഫിക്കറ്റുകള്‍ ഒന്ന് കാണേണ്ടി വരും"

ഞാന്‍ : "എപ്പോള്‍ വേണമെങ്കിലും കൊണ്ടുവരാം"

എസ് ഐ : "സക്കീന ശരിക്കും ഡോക്ടര്‍ ആണോ?"

ഞാന്‍ : "എനിക്കറിയില്ല. ആണെന്ന് അവര്‍ പറയുന്നു. അവരുടെ സര്‍ട്ടിഫിക്കറ്റുകള്‍ ഒന്നും ഞാന്‍ കണ്ടിട്ടില്ല."

എസ് ഐ : "നിങ്ങളുടെ പാഡില്‍ അവള്‍ തന്നെയാണ് എഴുതിയിരിക്കുന്നത്. അത് ഫിറോസും പറഞ്ഞു. പക്ഷേ അവളുടെ എഴുത്ത് കണ്ടാല്‍ വിദ്യാഭ്യാസം ഉള്ള ഒരാള്‍ എഴുതിയത് പോലെ ഇല്ല. അവളുടെ സര്‍ട്ടിഫിക്കറ്റുകള്‍ ഞാന്‍ കാണിച്ചു തന്നാല്‍ അത് ഒറിജിനല്‍ ആണോ എന്ന് താങ്കള്‍ക്ക് പറയാന്‍ കഴിയുമോ?"

ഞാന്‍ : "തീര്‍ച്ചയായും"

അങ്ങിനെ പോലീസ് മുഖാന്തിരം അവളുടെ സര്‍ട്ടിഫിക്കറ്റുകളുടെ കോപ്പി എന്റെ കയ്യിലെത്തി.

ആറ് മാസം കൊണ്ട് ഡോക്ടര്‍ ആവുന്ന കോഴ്സിന്റെ സര്‍ട്ടിഫിക്കറ്റ്. സര്‍ട്ടിഫിക്കറ്റ് കണ്ടാല്‍ ഒറിജിനലിനേക്കാള്‍ പത്തിരട്ടി മികച്ചത്. ബംഗാളില്‍ ഉള്ള ഒരു ഓപ്പണ്‍ യൂണിവേഴ്സിറ്റിയുടെ പേരില്‍.

ഞാന്‍ തറപ്പിച്ചു പറഞ്ഞു "ഇത് ഒറിജിനല്‍ അല്ല. വ്യാജ സര്‍ട്ടിഫിക്കറ്റ് ആണ്. ആറ് മാസം കൊണ്ട് ആയുര്‍വേദ ഡോക്ടര്‍ ആക്കുന്ന കോഴ്സ് ഇന്ത്യയില്‍ ഇല്ല. കൂടുതല്‍ വിശദാംശങ്ങള്‍ വേണമെങ്കില്‍ എ എം എ ഐ (ആയുര്‍വേദ മെഡിക്കല്‍ അസ്സോസിയേഷന്‍ ഓഫ് ഇന്ത്യ) യുടെ ജില്ലാ സെക്രട്ടറിയുടെ നമ്പര്‍ തരാം. ആയുര്‍വേദ ഡോക്ടര്‍മാരുടെ സംഘടനയില്‍ അവള്‍ അംഗമാണോ എന്നും അറിയാമല്ലോ"

അങ്ങിനെ പോലീസ് അവളെ കുറിച്ച് കൂടുതല്‍ അന്വേഷണം നടത്തി.

കുറച്ചു ദിവസങ്ങള്‍ക്ക് ശേഷം എസ് ഐ എന്നെ വീണ്ടും ഫോണില്‍ വിളിച്ചു.

"ബീറ്റ് റൂട്ട് മൂലക്കുരു ചികിത്സയില്‍ ഉപയോഗിക്കുന്നുണ്ടോ?" അദ്ദേഹം ചോദിച്ചു.

ഞാന്‍ : "ഞാന്‍ മനസ്സിലാക്കിയടത്തോളം ഇല്ല. പിന്നെ പൊതുവേ പച്ചക്കറികള്‍ കഴിക്കാന്‍ പ്രോത്സാഹിപ്പിക്കാറുണ്ട്."

എസ് ഐ : "അവള്‍ വ്യാജ ഡോക്ടര്‍ ആണ്. പൂര്‍വാശ്രമത്തില്‍ അവള്‍ തുന്നല്‍ക്കാരി (ടൈലര്‍) ആയിരുന്നു. പിന്നീട് ആയുര്‍വേദത്തിലേക്ക് തിരിഞ്ഞു. എസ് എസ് എല്‍ സി പോലും പാസ് ആയിട്ടില്ല. അവള്‍ക്കെതിരെ അറസ്റ്റ് വാറന്റ് ഇട്ടിട്ടുണ്ട്. അവള്‍ ആദ്യം മൂലക്കുരു പ്രദേശത്ത് കുറച്ച് കൈ ക്രിയകള്‍ നടത്തും. ഗ്ലൌസ് ഇട്ട് വിരല്‍ പിന്‍ഭാഗ വാതിലിലൂടെ ഒന്ന് അകത്ത് കയറ്റും. താന്‍ എന്തൊക്കേയോ ചെയ്യുന്നുണ്ട് എന്ന് രോഗിയെ ബോധ്യപ്പെടുത്തുന്നതിന് വേണ്ടി. കുറച്ച് സമയം അങ്ങിനെ കളഞ്ഞ ശേഷം അവള്‍ ബാഗില്‍ വെച്ച് കൊണ്ടുവന്ന ബീറ്റ് റൂട്ട് ജ്യൂസ് അടിച്ചത് കൊണ്ട് എനിമ (വസ്തി) കൊടുക്കും. ശേഷം ടോയിലെറ്റില്‍ പോകാന്‍ പറയും. ബീറ്റ് റൂട്ട് ജ്യൂസ് വയറ്റില്‍ നിന്നും പോകുന്നത് കാണുമ്പോള്‍ ചോരയാണ് അതെന്ന് രോഗി തെറ്റിധരിക്കും. പിന്നീട് കൊടുക്കുന്ന സിറപ്പില്‍  വേദനക്കും ശോധനക്കും ഉള്ള ഇംഗ്ലീഷ് മരുന്നുകള്‍ പൊടിച്ച് ചേര്‍ത്താണ് നല്‍കുന്നത്. അതുകൊണ്ട് രോഗിക്ക് വേദനാ രഹിതമായ സുഖശോധന ലഭിക്കും. അപ്പോള്‍ രോഗി ഹാപ്പി. ഇതാണ് അവളുടെ ചികിത്സാ രീതി." എസ് ഐ തന്റെ കണ്ടെത്തല്‍ വിശദീകരിച്ചു.

"അപ്പോള്‍ അവള്‍ കുടുങ്ങും അല്ലേ?" ഒരു വ്യാജ ഡോക്ടറെ സമൂഹത്തിനു മുന്നില്‍ തുറന്ന് കാണിക്കപ്പെടുമല്ലോ എന്ന സന്തോഷത്തോടെ ഞാന്‍ ചോദിച്ചു.

എസ് ഐ : "പ്രയാസമാണ്. അവള്‍ക്ക് ഉന്നതങ്ങളില്‍ നല്ല ബന്ധം ഉണ്ട്. ഡി വൈ എസ് പി എല്ലാം ഈ കേസ്സിന്റെ കാര്യത്തില്‍ ഇടപെടുന്നുണ്ട്. അവള്‍ക്ക് "പല പല" സൈഡ് ബിസിനെസ്സും ഉണ്ടെന്നാണ് അറിയുന്നത്. മാത്രമല്ല ഇപ്പോള്‍ അവള്‍ ഫിറോസിനെതിരെ ഒരു പരാതി നല്‍കിയിട്ടുണ്ട്."

ഞാന്‍ : "ഫിറോസിനെതിരെ പരാതിയോ?"

എസ് ഐ : "അതെ. അവള്‍ ചികിത്സ നടത്തുമ്പോള്‍ അവന്‍ അവളെ കയറി പിടിച്ച് പീഡിപ്പിക്കാന്‍ ശ്രമിച്ചു എന്നും, ആ പീഡന ശ്രമം വിജയിക്കാത്തതില്‍ ഉള്ള പ്രതികാരമായാണ് അവന്‍ പരാതി നല്‍കിയത് എന്നും അവള്‍ പറയുന്നു."

ഞാന്‍ : "അവള്‍ ഈ വിഷയം അന്ന് പറഞ്ഞില്ലല്ലോ. പീഡിപ്പിക്കാന്‍ നോക്കിയാല്‍ അവള്‍ അപ്പോള്‍ തന്നെ ബഹളം വെക്കേണ്ടതല്ലേ? "

എസ് ഐ : "ഈ ചോദ്യം ഞാന്‍ ചോദിച്ചു. പാവം പയ്യനല്ലേ, അവന്റെ ഭാവി കളയേണ്ടാ എന്ന് കരുതിയാണത്രേ അന്ന് പറയാതിരുന്നത്. ഇപ്പോള്‍ അവന്‍ പോലീസില്‍ പോയപ്പോള്‍ അവളും ആ കാര്യം പുറത്ത് വിട്ടതാണത്രേ."

"അത് അവളുടെ നമ്പര്‍ ആണ്" ഞാന്‍ ചിരിച്ചുകൊണ്ട് പറഞ്ഞു.

എസ് ഐ : "അതെ. മാത്രമല്ല, പീഡന കേസ് പിന്‍വലിക്കണമെങ്കില്‍ മാന നഷ്ട പരിഹാരമായി 5 ലക്ഷം രൂപ നല്‍കണം എന്നും അവള്‍ ആവശ്യപ്പെട്ടിട്ടുണ്ട്."

ഞാന്‍ : "എന്നിട്ടിപ്പോള്‍ എന്താ കേസിന്റെ സ്ഥിതി?"

എസ് ഐ : "അവനും അറസ്റ്റ് വാറന്റ് കൊടുക്കുകയാണ്. പാസ്പോര്‍ട്ട് സ്റ്റേഷനില്‍ ഹാജരാക്കാനും ആവശ്യപ്പെട്ടിട്ടുണ്ട്. കേസ് മിക്കവാറും ഇനി അവനു എതിരാവും. അതിനുള്ള ഇടപെടലുകള്‍ നടക്കുന്നുണ്ട്. എന്റെ കയ്യില്‍ നിന്നും കേസ് പോകാനും സാധ്യതയുണ്ട്." നിസ്സഹായനായ ആ പോലീസുകാരന്‍ നിരാശയോടെ പറഞ്ഞു.

ഇപ്പോള്‍ അവനും ജാമ്യത്തില്‍ ആണ്. കേസ് തുടര്‍ന്നുകൊണ്ടിരിക്കുന്നു.

വ്യാജ ഡോക്ടര്‍ ആണെന്നറിഞ്ഞിട്ടും സക്കീനയെ തൊടാന്‍ പോലീസിന് കഴിഞ്ഞില്ല. അവള്‍ ഇപ്പോഴും മൂലക്കുരു ചികത്സ നടത്തി പണമുണ്ടാക്കി കൊണ്ടിരിക്കുന്നു. ഒരു വ്യാജ ഡോക്ടറെ തിരിച്ചറിയാന്‍ കഴിഞ്ഞവന്‍ പീഡന കേസില്‍ പ്രതിയുമായി.
നോക്കണേ നമ്മുടെ ഭ്രാന്താലയത്തിലെ ഓരോരോ കളികള്‍.

അബസ്വരം :
കണ്ടറിയാത്തവന്‍ കൊണ്ടറിയും !!!


സാമൂഹിക പ്രശ്നങ്ങളുമായി ബന്ധപ്പെട്ട കൂടുതല്‍  പോസ്റ്റുകള്‍ക്ക് ഇവിടെ ക്ലിക്കുക